Iōng bó-gí tshiùⁿ-kua pún-tsiâⁿ ing-kai sī tsū-jiân ê tāi-tsì: Thiaⁿ “Gō͘-tiâu-jîn”

用母語唱歌本成應該是自然ê代誌：聽《五條人》

Sī teh siáu Tiong-kok, siáu Lông-tshun, ia̍h-sī teh siáu Hoklo? Guá si̍t-tsāi giâu-gî.

Pài-sì àm tsìn-tsîng, guá m̄-bat thiaⁿ--kuè, mā m̄-bat thiaⁿ-lâng kóng-kuè “Gō͘-tiâu-jîn” tsit-ê thuân-thé kap in tshiùⁿ ê kua. Tíng lé-pài, tī bīn-tsheh (facebook) tíng-kuân khuàⁿ-tio̍h tsi̍t-ê ián-tshut ê siau-sit. Tiuⁿ Thih-tsì (張鐵志) án-ne kài-siāu

中國民謠樂隊五條人台北演出

...邀請廣東的民謠組合樂隊五條人。...

...尤其，他們對台灣人是親切的。因為他們的方言接近閩南語，並深受陳明章與林生祥的影響。... (âng-sik sī guá ka--ê)

Khuàⁿ in àn kńg-tang lâi, kóng ê "hong-giân" kap "Bân-lâm-gí" koh tsin uá, guá siūⁿ, kám kóng sī tshiùⁿ tiô-tsiu-uē--ê? Nā-sī án-ne, si̍t-tsāi put-tsí-á sim-sik. Tsóng-sī, m̄-bat thiaⁿ kuè tiô-tsiu-uē ê hiān-tiûⁿ piáu-ián, mā m̄-tsai ū tsâi-tiāu thiaⁿ-bat guā-tsē. Guá siūⁿ, Tiuⁿ Thih-tsì kám tsin-tsiàⁿ hiah-nī m̄-bat-jī koh bô-uē-sing, kám kóng i m̄-tsai ū "tiô-tsiu-uē" tsit-ê sû?

Gún khan--ê kóng, huān-sè in tsin-tsiàⁿ m̄-sī kóng tiô-tsiu-uē--ê neh. Guá siūⁿ-siūⁿ leh kám-kak án-ne kóng mā-sī ū tō͘-lí, tio̍h khì thàm-thiaⁿ khuàⁿ in kám sī tiô-tsiu-lâng. Kiat-kó in koh tsin-tsiàⁿ m̄-sī, in sī hái-hong(海豐) hit-tah ê lâng. Tsìn-tsîng tio̍h bat thiaⁿ-kóng hái-hong/lio̍k-hong (海豐/陸豐) hit-tah ê uē, pí tiô-tsiu-uē khah uá Tài-gî. Tī tsit-ê sî-tāi, hán-tit ū-lâng teh iōng bó-gí tshiùⁿ-kua, jî-tshiáⁿ koh-sī kap Tài-gî tsin uá ê uē-gí, khuàⁿ-khí-lâi bô khì kā thiaⁿ tsi̍t--ê buē-sái.

Pài-sì àm guá lâng kàu hiān-tiûⁿ í-king 7-tiám puàⁿ, piáu-ián àn-sǹg beh khai-sí ê sî-kan. Kau-kuan 100 kho͘ uāⁿ tsi̍t-kuàn bì-luh, guân-té tio̍h bô kài-tuā ê tiûⁿ-tē, ē-sái kóng muá-muá lóng sī lâng. Lâi tsit-ê só͘-tsai khuàⁿ kuè kuí tiûⁿ piáu-ián, m̄-bat khuàⁿ kuè tsiah-ní tsē lâng. Kám kóng lóng-sī uī-tio̍h beh thiaⁿ hái-hong-uē tshiùⁿ--ê kua tsiah lâi--ê?

“Gō͘-tiâu-jîn” sī nn̄g-ê lâng ê thuân. Tsi̍t-ê giâ gí-tah, tsit-ê the̍h tshiú-hong-khîm. Piáu-ián khai-sí, Tiuⁿ Thih-tsì tshut-lâi kán-tan kài-siāu tsit-ê thuân, tong-jiân sī iōng Huâ-gí. Liáu uāⁿ tsú-tshiùⁿ tsū-ngó͘ kài-siāu, iû-guân sī kóng Huâ-gí. Huâ-gí ê Pak-á khiuⁿ bô tāng. Tē it tiâu kua, m̄-tsai sī in-uī in iōng ti̍k-pia̍t ê tshiú-lō͘ huat-siaⁿ, ia̍h-sī iáu-buē kuàn-sì in--ê khiuⁿ-kháu, si̍t-tsāi thiaⁿ lóng-bô. Ta̍k tiâu kua beh tshiùⁿ tsìn-tsîng, in lóng sing iōng huâ-gí kái-sueh tsi̍t piàn. Kua-sû sī lóng tsin pe̍h-uē, in nā mài ai, mài ki, mài iōng huah--ê, tsiām-tsiām-á lú thiaⁿ lú ū, tsha-put-to thiaⁿ ū 7, 8 siâⁿ.

Khuàⁿ in án-ne iōng in ka-tī ê bó-gí tshiùⁿ-kua, guá sim huaⁿ-hí. Iōng bó-gí tshiùⁿ-kua, pún-tsiâⁿ tio̍h-sī tsū-jiân ê tāi-tsì. Put-jî-kò

iáu-buē-suah....

• http://hkfringeclub.blogspot.com/2010/02/guangzhou-indie-live.html
• http://blog.roodo.com/SoundsandFury/archives/12992205.html
• http://blog.udn.com/mayersu/4220880