方言？母語？族語？

有按呢个想法嘛有一暫仔--a。雖罔講猶無法度共這個想法講kah真清楚，先共基本个想法寫落來，逐家罔參考。

踏話頭：
2008年選舉前，選舉後，有兩句話佇媒體teh傳：
*『想念以往的日子，沒有藍綠』
*『外省人馬英九選上了總統，台灣人用選票打破了省籍魔咒』
基本上我完全無同意即兩句話。我欲[beh]講--个，是「族群」，「族群認同」，kap「同化」。

我欲講个，是我感覺咱愛按phah-piàⁿ个是咱族群个族群認同，這個社會對多元族群/文化个尊長佮避免壓迫式个同化。我想欲咱个族群會使繼續塗炭，所以我想欲我个子孫會曉咱个族語。我想欲咱族群个文化語言繼續發展，所以我向望本底書寫傳統無深个咱个族語，會使較緊發展出伊个書寫个傳統。我要求个，是一個族群佇這個社會生存个權利佮徛起个機會。

定定有儂講：台灣有75%个人是Hololang。閣定定有儂講台灣个Hololang，並無一個強个族群認同，全世界，散各國个講閩南語个儂，嘛無一個強个族群認同。我會看法是：一部分个Hololang華語化去--a，m̄-koh猶原有認同部份个Holo文化，咱犯勢會使共怹號做HuaHolo。一部分猶原想欲保存Holo个語言，咱犯勢會使共號做HoloHolo。我家己，是卡認同HoloHolo是我个族群。

HuaHolo是毋是著是無愛台灣?我个看法是：毋是。HuaHolo嘛有真愛台灣--个。只是佇族語方面 ka HolHolo行無仝个路niā-niā。另外，我卡按怎算，攏感覺咱HoloHolo是弱勢閣少數个族群--lah。

為啥物我欲講「族語」無愛講「母語」? 佇台灣，咱尚會曉个第一語言，定定毋是咱認同个族群个語言，定定是同化者个語言。囡仔个母親，無定著伊个第一語言是華語，毋閣伊想欲伊个囝兒會曉伊个族語，上好是互囝兒共族語當做第一語言。按呢个教育，我認為用『族語教育』稱號卡有道理。

*若按族群个角度來看，台灣應該是濟濟族群个社會。毋閣不時有人欲共別人『同化』。
*向望未來个台灣是一個濟濟族群多元共存个社會。
*毋成族个漢族內个多元族群認同。
*家己族个語言愛家己先拚出來救。

(猶未紲)